Azərbaycan və Türkiyənin uzun və əsaslı yaxınlaşma proqramı sistem sıçrayışına şərait yaratdı.

Axar.az xəbər verir ki, bunu öz Feysbuk səhifəsində ukraynalı hərbi ekspert Aleksey Arestoviç paylaşıb.

“İndi Azərbaycan-Türkiyə alyansında siyasi və hərbi imkanlar keyfiyyət olaraq artıb. Qafqazda yeni reallıq yaranıb”, – deyə o bildirib.

Arestoviç Türkiyə ilə Azərbaycan arasında müttəfiqlik bəyannaməsinin Rusiya kontingentinin Qarabağda mövcudluğunu daha beş il uzatması məsələsinini təxirə saldığını söyləyib. Hərbi ekspert bildirib ki, yaxın gələcəkdə Fransanın Şimali Afrika, Mərkəzi Aralıq dənizi, Yaxın Şərq və Cənubi Qafqazda ənənəvi maraq zonaları NATO çərçivəsində Türkiyənin himayəsinə keçəcək:

“Üstəlik, Türkiyənin hərbi-siyasi təsiri Əfqanıstan və Qırğızıstana yayılır. Bura Çinin təhlükəsizlik qurşağı sayılır. Türkiyənin NATO-da rolunun artırılmasına Britaniya ciddi lobbiçilik edir. NATO sammiti Breksitdən sonra yaranan yeni geosiyasi konfiqurasiyanı təsdiqlədi. London-Ankara tandemi Məğrib, Aralıq dənizi, Yaxın Şərq, Cənub-Şərqi Avropa, Mərkəzi Asiya və Cənubi Qafqazın geosiyasi xəritəsini dəyişməyə çalışır. Bu, sərt mövqe və sistemli səy deməkdir. Dünyada yeni böyük oyun başlayıb və əsas oyunçu Türkiyə, eləcə də Azərbaycandır".