2023.12.04. 16:47

Ermənistan parlamentinin komissiyası “Ayakve” mülki təşəbbüsü çərçivəsində irəli sürülən Qarabağ ermənilərinin öz müqəddəratını təyinetmə hüququndan imtinaya görə cinayət məsuliyyətini nəzərdə tutan qadağanı ona görə dəstəkləməyib ki, əks halda bu, Azərbaycanla növbəti müharibəyə səbəb olacaqdı.

Axar.az xəbər verir ki, bu barədə politoloq Elxan Şahinoğlu qeyd edib.

O bildirib ki, hakim “Mülki müqavilə” fraksiyasından olan deputatlar müxalifətin təklifini neytrallaşdırıblar:

“Çünki onlar anlayırlar ki, erməni müxalifəti Baş nazir Nikol Paşinyanın mövqelərini zəiflətmək üçün Ermənistanı Azərbaycanla yeni toqquşmaya sürükləmək istəyir. Əgər Ermənistan parlamenti Qarabağla bağlı təxribatçı dəyişikliyi qəbul etsəydi, Azərbaycan buna seyrçi qalmayacaqdı. Belə bir “dəyişikliyin” qəbulu iki ölkə arasında sülh sazişinin imzalanmasını da mümkünsüz edir. Erməni müxalifətinin məqsədi bəllidir. Onlar Nikol Paşinyanı Azərbaycanla yeni müharibəyə sürükləmək istəyirlər. Müxalifət bu müharibədən də Azərbaycanın qalib çıxacağını bildiyindən, bu yolla Paşinyanı devirməyi planlaşdırır. Öz növbəsində Paşinyan öz müxalifətinin planlarını pozmaqla məşğuldur”.

Qeyd edək ki, dekabrın 4-də Ermənistan parlamentinin Dövlət Hüquq Məsələləri Daimi Komissiyası Cinayət Məcəlləsinə Qarabağ əhalisinin öz müqəddəratını təyinetmə hüququndan imtinaya görə cinayət məsuliyyətini nəzərdə tutan qanunvericilik dəyişikliklərinə mənfi rəy verib.

Qanunvericiliyə dəyişiklikləri “Ayakve” vətəndaş-siyasi təşəbbüsü təklif edib.

Buna baxmayaraq, parlamentin qarşıdakı 4 günlük iclasının gündəliyinə qanunvericilik təşəbbüsü mənfi nəticə ilə daxil edilib.