Qlobal ssenariyə və proseslərə nəzər salsaq, Orta Dəhlizin hansı rolu oynaya biləcəyi xüsusilə aydın görünür. Əgər biz - həm Azərbaycan, həm də Gürcüstan öz mövqeyimizi düzgün tutsaq, şübhəsiz ki, Orta Dəhlizin inkişafında həlledici rol oynaya bilərik. Bunun üçün iki ölkə arasında mövcud olan tərəfdaşlıq vacibdir.

Axar.az xəbər verir ki, bu sözləri Gürcüstanın xarici işlər naziri Maka Boçorişvili deyib.

Onun sözlərinə görə, ötən illər ərzində ölkələrimiz arasında qurulan dostluq münasibətləri bu prosesə ancaq töhfə verib:

"Müstəqilliyimizin bərpasından sonra Gürcüstanla Azərbaycan arasında əməkdaşlıq daha çox regional layihələrin həyata keçirilməsinə yönəlib. Bu gün biz bunun bəhrəsini və faydalarını aydın görürük.

Bu gün təkcə ölkələrimizi deyil, regionumuzu inkişaf etdirmək üçün potensial daha böyükdür, bölgədə daha böyük imkanlar var. Buna görə də iki ölkə arasında fəaliyyəti əlaqələndirmək, əməkdaşlığı gücləndirmək xüsusilə vacibdir. Mövcud geosiyasi vəziyyətin təmin etdiyi imkanlardan, regionumuzun coğrafi yerləşməsindən düzgün istifadə etmək lazımdır”.