Moskva 9 May Qələbə Gününə həsr olunmuş tədbirlərdə Azərbaycan Prezidenti İlham Əliyev və Ermənistanın Baş naziri Nikol Paşinyanı gözləyir.

Axar.az xəbər verir ki, bunu Rusiya Xarici İşlər Nazirliyinin rəsmisi Mariya Zaxarova deyib.

"Biz bunu yalnız alqışlayırıq, həm Azərbaycan, həm də Ermənistan rəhbərliyini gözləyirik. Dəvət alıb iştirakını təsdiqləyən ölkələrin liderlərini hər zaman görməyə şadıq", - Zaxarova qeyd edib.

Onun sözlərinə görə, bu əlamətdar və birləşdirici tarixin layiqli qeyd olunması üçün bütün istiqamətlərdə genişmiqyaslı hazırlıq işləri aparılır.

Diplomat vurğulayıb ki, Rusiya çoxmillətli Sovet İttifaqının hər bir xalqının Böyük Vətən Müharibəsində alman nasizmi və yapon militarizmi üzərində ümumi qələbəyə verdiyi töhfəni xatırlayır:

"Azərbaycan və Ermənistanla bağlı onu qeyd etmək lazımdır ki, bu xalqlardan yüz minlərlə nümayəndə Böyük Vətən Müharibəsinin bütün mühüm əməliyyatlarında genişmiqyaslı və qəhrəmancasına iştirak edib. Onların təxminən yarısı cəbhədən geri dönməyib".