Təqdim edəcəyimiz atəşfəşanlıq hər hansı bir bayram və ya təntənəli bir mərasimdən deyil, bölgələrin birində keçirilən toy mərasimindəndir.

Xəzər xəbər-in məlumatına görə, son dövrlər istər toy, istərsə də ad günlərinin sonunda belə atəşfəşanlıq olur ki, bu da çox vaxt şadlıq evlərinə yaxın ərazilərdə yerləşən insanların narazılığına səbəb olur.

Əslində isə belə vasitələrin həm satışı, həm də istifadəsi qanunla qadağandır. Bu günə kimi Daxili İşlər Nazirliyinin orqanları tərəfindən 40 mindən artıq belə vasitə tutularaq zərərsizləşdirilib.

Yüksək səsli paylayıcı olan pirotexniki vastilərin satışına xüsusi sərəncama əsasən yol verilmir. Bu vasitələrdən istifadə yalnız xüsusi sənədlərlə mümkündür.

Belə vasitələrdən qanunsuz istifadə edənlər İnzibati Xətalar Məcəlləsinə uyğun olaraq cəzalandırılırlar.

Rayonda baş verən hadisəyə görə isə həmin bölgənin polis idarəsində araşdırma başlayıb.