2016-cı ildə Azərbaycanda bütün maliyyə mənbələri hesabına ümumi sahəsi 1 milyon 677,1 min kvadratmetr olan yeni yaşayış evləri istifadəyə verilib.

Dövlət Statistika Komitəsindən Axar.az-a bildirilib ki, ümumi sahənin 78,6 min kvadratmetri doğma yurdlarını tərk etmiş məcburi köçkünlər üçün tikilmiş evlərdir.

İl ərzində mənzil tikintisinə sərf olunan vəsaitin həcmi 683,5 milyon təşkil edib. Bunun 47,5 milyon manatı dövlət, 636,0 milyon manatı isə qeyri-dövlət mülkiyyətində olan müəssisə və təşkilatların payına düşüb.

Ölkə vətəndaşları mənzil şəraitlərinin yaxşılaşdırılması məqsədilə şəxsi vəsaitləri hesabına 11,2 min yaşayış evi tikiblər. Evlərin əksəriyyəti Naxçıvan Muxtar Respublikasında, Bakıda, Lənkəran, Abşeron, Şəmkir, Tovuz, Kürdəmir, Cəlilabad və Qəbələ rayonlarında inşa olunub.