"Qapını bağladım? Ütünü söndürdüm? Suyu açıq qoymuşam?" Ağlınıza belə fikirlər gəlirsə, mütləq həkimə müraciət edin.

Axar.az Region Tv-yə istinadən xəbər verir ki, son zamanlar obsessiv-kompulsiv pozuntulardan əziyyət çəkən insanların sayı artıb.

Obsessiya və kompulsiya insanın beyninə istəmədən daxil olan, təkrarlanan, qovulması çətin düşüncələrdir. Həkimlər həyəcan təbili çalır ki, psixoloji pozuntu reabilitasiya edilməsə, ciddi xəstəliklər yaradır.

Psixoloqlar isə xəbərdarlıq edirlər. Bu tip psixoloji pozuntular böhranlı vəziyyətlərdə qazanılan travmalarla əlaqədardır. Psixoloq Könül Cəfərova sözügedən psixoloji vəziyyətlə bağlı deyir:

"Məsələn, evdən çıxır, qapını bağlayıb gedir, yolun yarısında ağlına fikir gəlir ki, görəsən qapını bağladım, ütünü söndürdümmü? Yenidən evə qayıdır. O, əslində ütünü söndürüb. Yaxınları ona dəfələrlə desələr də ki, bəli, sən ütünü söndürdün, suyu bağladın, xeyri yoxdur, o insanın ağlında eyni şeylər qalır. Bu, insanın tamamlanmamış daxili şəxsiyyətidir".

Xəstəliyin konkret yaranma səbəbi yoxdur. Mütəxəssislər bu tip pozuntuların meydana gəlməsində depressiyanı istisna etmirlər. Reabilitasiyasına gəlincə isə, dərman preparatları və psixoloji müayinə ilə problemi aradan qaldırmaq mümkündür. Müalicə müddəti 3 aydan 6 aya qədər çəkə bilər.

Xəstəlik müalicə olunmadıqda davamlı nevroza gətirib çıxarır. Bu tip pozuntulardan uzaq durmaq üçün sağlam həyat tərzi seçmək, depressiyaya sürükləyəcək işlərdən uzaq durmaq lazımdır. Psixoloqlar belə deyir.