İqtisadiyyat Nazirliyi yanında Dövlət Vergi Xidmətinin Vergi Siyasəti Baş İdarəsinin rəisi Nicat İmanov bildirib ki, elektromobil və hibridlərin ƏDV-yə cəlb edilməsi yerli istehsala dəstək məqsədi daşıyır. Hansı yerli avtomobil, hansı istehsal? Azərbaycanda avtomobil istehsalı yoxdur, yalnız yığım var, o da benzinlə işləyən avtomobillərdir. Hardadır o yerli istehsal olan elektrik və hibrid maşınlar?

Axar.az xəbər verir ki, bunu iqtisadçı Natiq Cəfərli bildirib.

“Türkiyədə 13 avtomobil istehsalı zavodu var (“Renault”, “Ford”, FIAT, “Hyunday”, “Toyota” və s.). Onların detallarının 35–45 faizi elə Türkiyədə istehsal olunur. Avtomobil istehsalının yan sənayesi yaranıb, yan sənayedə on minlərlə iş yeri açılıb. Ümumilikdə Türkiyə avtomobil sənayesində 410 min insan çalışır.

İstehsal budur, yoxsa təkcə təkərinin havası yerli olan maşınlar istehsal ola bilməz. Üstəlik o maşınlar da satılmır, yığılan avtomobillərin yarıdan çoxunun müştərisi dövlət qurumlarıdır, yəni büdcədir. Buna da “istehsal” deyirlər”, - o qeyd edib.