İcbari Avtomobil Sığortasında hadisə başına 5 min manat ödəniş limiti bugünkü bahalaşma fonunda bir çox hallarda zərərçəkmişlər arasında narazılıq yaradır. Avtomobil detallarının və təmir xərclərinin kəskin bahalaşdığı bir vaxtda 2011-ci ildən qalan limit real zərəri qarşılamır.

Bu sözləri Axar.az-a açıqlamasında sığorta eksperti İlkin Nəcəfov mövcud sistemdəki uyğunsuzluqlar barədə danışarkən deyib.

Onun sözlərinə görə, məsələ yalnız limitin artırılması ilə bitmir, çünki bunun sığorta haqqına da təsiri olacaq:

“Limit artırılırsa, deməli, sığorta haqqı da artırılmalıdır. Azərbaycanda artıq bir neçə ildir ki, risk əsaslı sığorta sisteminə keçilib. Bonus-malus sistemi müxtəlif amillər əsasında formalaşır. Bir nəfər üçün 75 manat hesablanırsa, riskli sürücü üçün nəzəri olaraq bu məbləğ 750 manata qədər qalxa bilər”.

Ekspert bildirib ki, hazırda riskli sürücülərdə, xüsusilə taksi fəaliyyəti göstərən “Prius” sahiblərində sığorta haqları 700–1000 manata qədər yüksəldiyi üçün onlar çox vaxt sığortalanmaqdan imtina edirlər:

“Elə sürücülər var ki, sığorta haqqının bahalığına görə 20 gündən bir 50 manat cəriməni ödəməyi sığorta almaqdan daha sərfəli hesab edirlər”.

Nəcəfov əlavə edib ki, baza qiymətinin artırılması üçün qanunvericiliyə dəyişiklik edilməlidir.