Qazaxıstanda qumar oyunlarının təşkili və keçirilməsi qaydasını tənzimləyən qanunvericiliyin tələblərini pozaraq qanunsuz qumar biznesinin həyata keçirilməsi ilə məşğul olan qrup aşkarlanıb.

Axar.az xəbər verir ki, bu barədə Qazaxıstan Prokurorluğu məlumat yayıb.

Bildirilib ki, cinayətkar sxemin əsas təşkilatçılarından biri xarici dövlətin (Azərbaycan) vətəndaşıdır və o, Qazaxıstan ərazisindən kənarda qanunsuz qumar biznesinə texniki dəstək və maliyyə idarəetməsi təmin edib və cinayət yolu ilə əldə edilmiş vəsaitlərin hərəkətinə nəzarəti həyata keçirib.

“Xarici vətəndaşın Qazaxıstan Respublikasından kənarda olması səbəbindən cinayət işi təqib olunması üçün Azərbaycana göndərilib. Cinayətkar qrupun digər üzvü ilə bağlı məhkəməyəqədər istintaq başa çatıb, cinayət işi məhkəməyə göndərilib və baxışdan sonra ona azadlıqdan məhrum etmə cəzası verilib”, - məlumatda qeyd edilib.