Bakı şəhərində, xüsusilə “Sahil” metrostansiyası ətrafında yerləşən yeraltı piyada keçidlərində eskalatorların uzun müddətdir işləməməsi sakinlərin narazılığına səbəb olub. Vətəndaşlar bildirir ki, bəzi keçidlərdə quraşdırılan travelatorlar ümumiyyətlə istismar olunmur, bu isə həm rahatlığa, həm də əlillər və yaşlılar üçün əlçatanlığa ciddi maneə yaradır.

Məsələ ilə bağlı Avtomobil Yolları Dövlət Agentliyinin (AAYDA) mətbuat xidmətinin rəhbəri Anar Nəcəfli Axar.az-a açıqlamasında bildirib ki, şəhər infrastrukturunun təhlükəsiz və rahat istifadəsinin təmin edilməsi məqsədilə yeraltı və yerüstü piyada keçidlərində nasaz vəziyyətdə olan eskalatorların təmiri istiqamətində işlər həyata keçirilir.

“Aparılan texniki baxışlar nəticəsində bir sıra keçidlərdə eskalatorlarda mexaniki nasazlıqlar və istismar müddətini başa vurmuş detallar müəyyən edilib və bu səbəbdən təmir-bərpa işlərinə başlanılıb. Artıq bir neçə ərazidə eskalatorların təmiri yekunlaşıb, avadanlıqlar tam işlək vəziyyətə gətirilib və vətəndaşların istifadəsinə təqdim olunub. Hazırda digər keçidlərdə də mərhələli şəkildə bərpa işləri davam etdirilir”.

Anar Nəcəfli əlavə edib ki, “Bakı şəhərində və ətraf ərazilərdə nəqliyyat infrastrukturunun təkmilləşdirilməsinə dair 2025–2030-cu illər üçün Dövlət Proqramı” çərçivəsində şəhər üzrə bütün yeraltı və yerüstü piyada keçidlərində quraşdırılmış eskalatorların vəziyyəti ilə bağlı genişmiqyaslı monitorinqlər aparılır. Monitorinqlərin nəticələrinə əsasən eskalatorların yenilənməsi, müasir standartlara cavab verən avadanlıqlarla əvəzlənməsi və texniki xidmətin keyfiyyətinin artırılması nəzərdə tutulur.