Buraxılış imtahanlarının çətinlik səviyyəsi ötən illə müqayisədə demək olar ki, eynidir. Yəni “bu il çətin, növbəti il asan olsun” prinsipi tətbiq edilmir. İmtahanın asan və ya çətin olması daha çox abituriyentlərin hazırlıq səviyyəsindən asılıdır. Hesab edirəm ki, bu ilin məzunları əvvəlki illərlə müqayisədə daha hazırlıqlıdır. Çünki 2019-cu ildən etibarən tətbiq olunan yeni model üzrə imtahanlarda və sınaqlarda iştirak ediblər və sual tiplərinə bələddirlər. Bu səbəbdən də yüksək bal toplayan abituriyentlərin sayında müəyyən artım ola bilər.

Bu sözləri Axar.az-a açıqlamasında təhsil eksperti Elçin Əfəndi buraxılış imtahanlarının çətinlik səviyyəsi və bu il gözlənilən nəticələr barədə danışarkən deyib.

“Gələn il qəbul imtahanının xarici dil blokunda nəzərdə tutulan dəyişikliklər ümumi nəticələrə təsir göstərə bilər. Bu baxımdan cari il abituriyentləri üçün mövcud model daha tanış və proqnozlaşdırıla bilən hesab olunur”, - o bildirib.

Qeyd edək ki, 11-ci sinif üzrə buraxılış imtahanı 9 və 15 mart tarixlərində keçiriləcək. Əvvəlki illərin məzunları üçün buraxılış imtahanı 19 aprel tarixində təşkil olunacaq.