Gürcüstan Azərbaycanlıları Konqresi (GAK) 2026-cı ili "Aşıq Hüseyn Saraçlı ili" elan edib.

Axar.az xəbər verir ki, bu barədə Report-a GAK-ın sədri Hüseyn Yusubov bildirib.

Onun sözlərinə görə, bu qərar böyük sənətkar Aşıq Hüseyn Saraçlının zəngin yaradıcılığının daha geniş təbliği və onun irsinin yaşadılması məqsədi daşıyır.

H.Yusubov qeyd edib ki, bu münasibətlə cari il ərzində Gürcüstanın müxtəlif bölgələrində silsilə tədbirlər təşkil olunacaq:

"Bizim əsas məqsədimiz Aşıq Hüseyn Saraçlının yaradıcılığını gənc nəslə tanıtmaq, aşıq sənətinə marağı artırmaq və bu dəyərli mədəni irsi qoruyub gələcək nəsillərə ötürməkdir".

Sədr əlavə edib ki, keçiriləcək tədbirlər çərçivəsində konsert proqramları, ədəbi-bədii gecələr, elmi konfranslar və xatirə mərasimlərinin təşkili planlaşdırılır.

Qeyd edək ki, Aşıq Hüseyn Saraçlı Azərbaycan aşıq sənətinin görkəmli nümayəndələrindən biridir və onun yaradıcılığı regionun folklor ənənələrinin inkişafında mühüm rol oynayıb.