Kapital Bank 2025-ci ildə müştərilərdən 7 milyon 22 min 165 manat vəsaitin oğurlanmasının qarşısını alıb.

Axar.az xəbər verir ki, bunu Kapital bankın baş risk inzibatçısı Ağarza Baxşiyev bu gün keçirilən mətbuat konfransında deyib.

O qeyd edib ki, 2025-ci il ərzində bank müştərilərinin 1 milyon 2 min 873 kart əməliyyatı və 31 min 353 kart hesabı fırıldaqçılıq əməliyyatı ehtimalı olduğu üçün bank tərəfindən bloklanıb:

“Nəticədə vətəndaşlardan 7 milyon 22 min 165 manatın oğurlanması ehtimalının qarşısı alınıb.

2024-cü illə müqayisədə ötən il rəqəmsal fırıldaqçılıq üzrə hücum cəhdlərinin sayı da artıb. Xüsusilə, sosial mühəndislik üsulları vasitəsilə müştərilərin manipulyasiya edilməsi və vəsaitlərin mənimsənilməsinə yönələn cəhdlər daha intensiv xarakter alıb.

Digər tərəfdən, Kapital Bank adından saxta reklam, elan, lotereya xarakterli kampaniya həyata keçirdiyini iddia edən 1000-dən çox veb-sayt və sosial media səhifəsi də bloklanıb”.

A.Baxşiyev əlavə edib ki, 2025-ci ildə 40 000-dən çox istifadəçinin cihazında Birbank tətbiqinin fəaliyyətinə mane olan virus aşkarlanıb:

“Virusa yoluxan cihazlarda bank tətbiqi bloklanıb. Bununla da minlərlə vətəndaşın potensial dələduzluq riski ilə üzləşməsinin qarşısı alınıb”.