11:45

Ağdaş rayonu, Məhəmməd Füzuli küçəsində küçə işıqlandırma sistemləri nasaz vəziyyətdədir.

Bu barədə Axar.az-a rayon sakinlərindən məlumat verilib.

Onların sözlərinə görə, sözügedən ərazidə işıq dirəklərinin bir qismində lampalar ümumiyyətlə yanmır, bu isə axşam saatlarında hərəkəti çətinləşdirir və təhlükəsizliklə bağlı narahatlıq yaradır.

Ağdaş Rayon İcra hakimiyyətindən saytımıza bildirilib ki, küçələrə texniki baxış keçirilərkən 11 küçədə işıqlandırılmanın yenilənməsinə ehtiyac olduğu üzə çıxıb:

“2025-ci il ərzində həyata keçirilən dövlət layihəsi çərçivəsində Ağdaş şəhərinin 132 küçəsində müasir standartlara cavab verən işıqlandırma sistemləri quraşdırılıb və ərazilər işıqlandırılıb. Ümumilikdə bütün rayonun elektrik təsərrüfatının yenidən qurulması və müasirləşdirilməsi istiqamətində kompleks tədbirlər həyata keçirilir. Həmin işlərin icrası tərtib olunmuş qrafikə əsasən nəzarətdə saxlanılır və qısa müddətdə tamamlanması nəzərdə tutulur. Sözügedən Məhəmməd Füzuli küçəsi də hazırda bərpa işləri aparılan küçələrdən biridir. Küçənin işıqlandırılmasında yaranan problem yeraltı kabellərdəki nasazlıqla bağlıdır. Hazırda aidiyyəti texniki heyət tərəfindən nasazlığın dəqiq yerinin müəyyən edilməsi istiqamətində axtarış işləri aparılır. Nasazlıq aşkar olunan kimi dərhal təmir-bərpa işlərinə başlanılacaq və küçənin normal işıqlandırma rejimi təmin ediləcəkdir”.