Türkiyənin Azərbaycandakı səfirliyində səfir İsmayıl Alpər Coşqunun diplomatik missiyasının başa çatması münasibəti ilə qəbul keçirilib.

Report xəbər verir ki, Rusiyanın Azərbaycandakı səfiri Vladimir Doroxin tədbirdə çıxış edərək bildirib ki, İsmayıl Alpər Coşqun 1988-ci ildə karyerasına başlayıb və öz işində bir sıra yüksək zirvələri fəth edib. O, həmkarına gələcək fəaliyyətində uğur arzulayıb və bütün həmkarları adından hədiyyəni təqdim edib.

İ.A.Coşqun isə öz növbəsində bildirib ki, diplomatın həyatının ağır anlarından biri də ölkəylə, dostlarla vidalaşmadır. O qeyd edib ki, Bakıda diplomat işi ən böyük məsuliyyəti tələb edir, bu, həmçinin böyük imtiyazdır.

Səfir Azərbaycan rəhbərliyinə və həmkarlarına Bakıdakı diplomatik missiyasında göstərdikləri köməyə görə təşəkkür edib.

Xatırladaq ki, İ. A. Coşqun 2012-ci ildə Azərbaycana səfir təyin edilib.