Dövlət İmtahan Mərkəzi (DİM) I və IV ixtisas qrupları üzrə iyulun 12-də keçirilmiş qəbul imtahanının nəticələrini elan edib.

DİM-dən Axar.az-a bildirilib ki, imtahanda iştirak etmək üçün ərizəsi təsdiq olunmuş 30 min 300 abituriyentdən 916 nəfər imtahana gəlməyib. İmtahanda iştirak etməyənlərin 764 nəfəri I, 152 nəfəri isə IV ixtisas qrupunun payına düşür.

İmtahanda iştirak edən abituriyentlərdən 16 nəfər qaydaları pozduqlarına görə imtahandan xaric olunub və onların nəticələri ləğv edilib.

Abituriyentlər imtahan nəticələri, cavab kartı və cavab vərəqinin qrafik təsvirləri, həmçinin açıq tipli tapşırıqlar üzrə qiymətləndirmə meyarları ilə DİM-in rəsmi internet səhifəsində tanış ola bilərlər. Nəticələri mobil operatorlar vasitəsilə də öyrənmək mümkündür.