Rusiyada "xruşşovka" adlandırılan beşmərtəbəli panel binaların kütləvi şəkildə sökülməsinə başlanılıb. Moskvada sonuncu "xruşşovka" da söküldü. Görəsən bu məsələ paytaxt Bakı üçün də aktualdırmı?

Axar.az xəbər verir ki, əmlak eksperti Ramil Osmanlı Xəzər Xəbər-ə açıqlamasında başda "xruşşovka" layihəli binalar olmaqla, 1960-ci illərdən əvvələ dayanan "italiyan" və "Minsk", "Stalin" layihəli evlərin də sökülməli olduğunu bildirib. Ekspert bildirib ki, belə evlərin sökülməsi hökumətə böyük vəsait hesabına başa gələcəyindən, bu işdə tikinti şirkətlərinin maraqlı olmaları daha yaxşı olardı.

Ramil Osmanlı dövlətin infrastruktur xərclərini öz üzərinə götürəcəyi təqdirdə "xruşşov" layihəli binalardan tez bir zamanda azad olmağı mümkün sayıb.

Əmlak Eksperti Nüsrət İbrahimov isə belə evlərin sökülməsinə zərurət görmür.

"Bakıda hələ də 80-100 yaşı olan binalar qalır və onlar texniki, mühəndis tələblərinə cavab vermir. İlk növbədə, bu binalar və onların sakinləri üçün risklərin azaldılması barədə düşünmək lazımdır", - deyə mütəxəssis bildirib.