İzmir Azərbaycan Mədəniyyət və Həmrəylik Dərnəyi ilə Türkiyə Azərbaycan Dərnəkləri Federasiyası 8 Noyabr Zəfər Günü münasibətilə İzmirdə tədbir təşkil edib. Tədbir çərçivəsində Bornova Azərbaycan Dostluq Parkında yerləşən Xocalı abidəsi ziyarət olunub, şəhidlər yad edilib.

Axar.az xəbər verir ki, tədbirdə şəhidlərimizin əziz xatirəsi ehtiramla anılıb, bu Zəfərin Türk dünyası üçün daşıdığı əhəmiyyət bir daha vurğulanıb.

Tədbirdə çıxış edən dərnək rəhbərləri və iştirakçılar Qarabağın azad olunmasının yalnız Azərbaycanın deyil, bütün Türk dünyasının tarixində mühüm dönüş nöqtəsi olduğunu bildiriblər.

İzmir Azərbaycan Mədəniyyət və Həmrəylik Dərnəyinin sədri Əşrəf Tuna çıxışında Qarabağın işğaldan azad olunmasına aparan yoldan, verilən mübarizədən və 8 Noyabr Zəfər Gününün tarixi əhəmiyyətindən danışıb.

Tədbirdə çıxış edən jurnalist Nigar Ögeday Qarabağ Zəfərinin bütün Türk dünyasının ortaq qüruru olduğunu söyləyib.

Nigar Ögeday Türkiyə ilə Azərbaycan arasındakı qardaşlığın yalnız sözlərlə deyil, çətin günlərdə göstərilən həmrəyliklə də öz təsdiqini tapdığını vurğulayaraq, Türk dünyasının ortaq tarixinə və gələcəyinə sahib çıxmasının vacibliyini qeyd edib.

Aygün Əroğlu, Emil Cəfərov, Tural Paşayev, Vüsal Dadanoğlu, həmçinin MHP Bələdiyyə Məclisinin üzvü Veysəl Qarani Batı çıxış edib, Qarabağ Zəfəri haqda fikirlərini bölüşüblər.