9 Noyabr – Azərbaycan Respublikasının Dövlət Bayrağı Günü münasibətilə Fövqəladə Hallar Nazirliyinin qurumlarında və regional mərkəzlərində silsilə tədbirlər keçirilib.

FHN-dən Axar.az-a verilən məlumata görə, əvvəlcə, şəxsi heyət Ümummilli Lider Heydər Əliyevin abidəsi önünə gül dəstələri qoyaraq, Dahi Rəhbərin əziz xatirəsini dərin ehtiramla yad ediblər.

Həmçinin, tədbir iştirakçıları Dövlət Bayrağı muzeylərinə baş çəkərək xalqımızın dövlətçilik tarixini, milli rəmzlərimizin yaranma və təşəkkül prosesini əks etdirən eksponatlarla tanış olublar.

Dövlət Himninin səsləndirilməsi ilə başlanan tədbirlərdə Ulu Öndər Heydər Əliyevin, ölkəmizin suverenliyi və ərazi bütövlüyü uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilib.

Çıxışlarda Azərbaycan Respublikasının Dövlət Bayrağının xalqımızın milli kimliyini, tarixi yaddaşını, dövlətçilik ənənələrini və müstəqillik ideallarını özündə ehtiva edən müqəddəs dövlət rəmzi olduğu vurğulanıb.

Diqqətə çatdırılıb ki, Azərbaycan Xalq Cümhuriyyəti dövründə qəbul edilmiş üçrəngli bayraq milli dövlətçilik iradəsinin və azadlıq məfkurəsinin təcəssümü kimi tariximizdə özünəməxsus yer tutur. Sovet hakimiyyəti illərində bu rəmzin dövlət səviyyəsində istifadəsinə son qoyulsa da, xalqın milli yaddaşında və müstəqillik düşüncəsində üçrəngli bayrağa bağlılıq heç vaxt itirilməyib. Məhz Ümummilli Lider Heydər Əliyevin təşəbbüsü və siyasi iradəsi ilə 1990-cı il noyabrın 17-də Naxçıvan Muxtar Respublikası Ali Məclisinin sessiyasında üçrəngli bayrağın yenidən qaldırılması və dövlət bayrağı kimi qəbul edilməsi barədə tarixi qərar qəbul olunub. Bu qərar milli dövlətçilik ənənələrinin bərpası, müstəqillik ideyasının siyasi müstəvidə möhkəmləndirilməsi baxımından müstəsna əhəmiyyət daşıyıb.

Vurğulanıb ki, xalqın təkidli tələbi ilə 1993-cü ildə siyasi hakimiyyətə qayıdan Dahi Rəhbər Heydər Əliyevin rəhbərliyi altında Azərbaycan dövlətçiliyinin qorunması və möhkəmləndirilməsi, müstəqil dövlətin institusional əsaslarının formalaşdırılması, milli-mənəvi dəyərlərin və dövlət atributlarının hüquqi statusunun təsbit olunması istiqamətində ardıcıl siyasət həyata keçirilib. Onun hakimiyyətdə olduğu dövrdə üçrəngli bayrağımızın dövlətçilik sistemindəki yeri və əhəmiyyəti daha da möhkəmləndirilib, onun müstəqil Azərbaycanın suverenliyini, siyasi iradəsini və milli birliyini təcəssüm etdirən əsas rəmzlərdən biri kimi qorunması dövlət siyasətinin mühüm istiqamətinə çevrilib.

Qeyd edilib ki, Ümummilli Liderin müəyyən etdiyi dövlətçilik strategiyası Prezident İlham Əliyev tərəfindən müasir dövrün çağırışlarına uyğun şəkildə uğurla davam etdirilir və yeni məzmunla zənginləşdirilir. Dövlət başçısının təşəbbüsü ilə paytaxt Bakıda Dövlət Bayrağı Meydanının yaradılması, 9 noyabr tarixinin Dövlət Bayrağı Günü kimi təsis edilməsi milli dövlət rəmzlərinə verilən yüksək siyasi və mənəvi dəyərin bariz ifadəsidir. Bu siyasət nəticəsində bayrağımızın ictimai-siyasi həyatda, beynəlxalq arenalarda yeri və təbliği daha da güclənib, milli dövlətçiliyimizin simvolu kimi rolu yüksəlib.

44 günlük Vətən müharibəsində qazanılmış tarixi Zəfərin və 2023-cü ilin sentyabrında həyata keçirilmiş antiterror tədbirlərindən söz açan natiqlər qeyd ediblər ki, bu tarixi Qələbə nəticəsində Azərbaycanın ərazi bütövlüyünün və dövlət suverenliyinin tam bərpası üçrəngli bayrağımızın ölkəmizin bütün ərazisində dalğalanmasını təmin edib. Bu gün işğaldan azad edilmiş torpaqlarımızda, şəhər və kəndlərimizdə, dövlət sərhədlərimiz boyunca dalğalanan bayrağımız müstəqilliyimizin dönməzliyinin, milli birliyimizin, dövlətimizin qüdrətinin və xalqımızın tarixi Zəfərinin rəmzidir.

Natiqlər bildiriblər ki, Dövlət Bayrağına ehtiram dövlət müstəqilliyinə, milli tarixə və dövlətçilik dəyərlərinə ehtiramın ifadəsidir. Üçrəngli bayrağımızın uca tutulması, onun təmsil etdiyi idealların gələcək nəsillərə aşılanması hər bir vətəndaşın mənəvi borcudur.

Tədbirlər çərçivəsində Dövlət Bayrağı Gününün tarixi və əhəmiyyətinə həsr olunmuş videoçarxlar nümayiş etdirilib.