Təhsil Nazirliyi 2013-cü ildə Tələbə Qəbulu üzrə Dövlət Komissiyası (TQDK) tərəfindən keçirilmiş buraxılış imtahanlarında Bakı şəhəri məktəblərinin 9-cu sinif məzunlarının göstərdiyi nəticələrə dair hesabatı açıqlayıb.

"Axar.az" Təhsil Nazirliyinin saytına istinadən xəbər verir ki, araşdırma 336 məktəbdən toplanılmış məlumat əsasında hazırlanıb. 2012-2013-cü tədris ilində Bakı məktəblərində (tədqiqata daxil edilmiş) 29.651 şagird ümumi orta təhsil səviyyəsi üzrə məzun olub. Bu məktəblər üzrə 227 şagird Tələbə Qəbulu üzrə Dövlət Komissiyasının keçirdiyi buraxılış imtahanında iştirak etməyib. 3009 şagird (10.15%) həm ana dili, həm də riyaziyyat fənnlərindən "2" qiyməti alıb. Bir fəndən "2", digərindən "3" qiyməti alanların sayı isə 3.915 (13.20%) olub.

Ttədqiqatın məqsədi 2013-cü ildə TQDK tərəfindən keçirilmiş buraxılış imtahanlarında Bakı şəhərində fəaliyyət göstərən məktəblərin 9-cu sinif məzunlarının göstərdiyi nəticələrə əsasən məktəblər arasında keyfiyyət fərqini müəyyən etməkdir. Tədqiqat həm də bu araşdırma əsasında Bakı məktəblərinin reytinq siyahısını müəyyən edəcək.