Ay yarımdan çoxdur ki, Xəzərin Azərbaycan hissəsində mühərriki sıradan çıxan və borcu olduğu üçün limana buraxılmayan Rusiya quru yük gəmisi ilə bağlı razılaşma əldə olunub.

Məlumata görə, "Vatan-1" gəmisinə Bakı limanına yan almağa və lövbər salmağa nəhayət ki, icazə verilib. Bu, Həştərxan vilayətinin qubernatoru Aleksandr Jilkinin işə qarışmasından sonra mümkün olub.

Xəbər verildiyi kimi, gəmidə ərzaq, içməli su və yanacaq qurtarmışdı. Heyət üzvləri Rusiya hakimiyyətindən internet vasitəsilə kömək istəyirdi. Gəmi ay yarım əvvəl Bakıya sement gətirib, yükünü boşaldıb geri qayıtmaq istərkən əsas mühərriki sıradan çıxıb.

Eyni zamanda gəminin sahibi olan şirkət Bakı limanına olan 100 min dollar borcunu, heyət üzvlərinin maaşlarını ödəmir və mühərrikin təmiri üçün ehtiyat hissələri göndərmir. 10 nəfərlik heyət üzvünün 6-ı Ukrayna, 4-ü Rusiya vətəndaşıdır.

Bildirilir ki, Həştərxan qubernatorunun işə qarışmasından sonra Azərbaycan Dövlət Dəniz Administrasiyasının qəza-xilasetmə gəmisi Bakı sahillərindən 15 kilometr məsafədə dreyf edən "Vatan-1"ə yan alıb, hazırda gəmi limana çəkilir.

Gəmi limana yan aldıqdan sonra onun sahibi olan şirkətin təsisçiləri, gəmi kapitanı və Bakı limanının nümayəndələri arasında yaranmış problemin həlli üçün müzakirələr olacaq ("Virtualaz.org").