Fəhlələr tikinti yerində namaz qılıblar.

"Axar.az" Feysbuk sosial şəbəkəsinə istinadən xəbər verir ki, 2015-ci ildə Bakıda keçiriləcək Avropa Olimpiya Oyunları ilə əlaqədar olaraq tikilən Bakı Olimpiya Stadionunun fəhlələri namaz vaxtı elliklə tikinti yerində namaz qılıblar.

Bakı Olimpiya Stadionu Bakının Böyük Şor qəsəbəsində, "Koroğlu" metro-stansiyası yaxınlığında tikilir. 68 min tamaşaçı tutumlu Bakı Olimpiya Stadionunun tikintisi məqsədilə Azərbaycan Respublikası Dövlət Neft Şirkəti (ARDNŞ) ilə Türkiyənin "Tekfen İnşaat" şirkəti arasında 640 milyon ABŞ dolları dəyərində 24 aylıq müqavilə imzalanıb. Stadionun tikintisinin 2015-ci ilin mart ayında tamamlanması nəzərdə tutulub.

Qeyd edək ki, "Tekfen İnşaat"ın bundan öncəki ən böyük işi 2002-ci ildə İstanbulda tamamladığı 80 min nəfərlik Atatürk Olimpiyada Stadionunu olub. "Tekfen İnşaat" şirkəti Azərbaycanda 1996-cı ildən fəaliyyət göstərir.