Bələdiyyə sakinlərə bildiriş paylayaraq əmlak vergisini vaxtında ödəməsələr məhkəməyə müraciət ediləcəyini xəbər verib.

Xəzər xəbər-in məlumatına görə, bu cür bildirişlərə paytaxtın demək olar ki, bütün rayonlarında rast gəlinir. Vətəndaşlar isə tərəddüd içərisindədirlər ki, indiyə kimi bələdiyyə onlara hansı xidməti təklif edib ki, bunun müqabilində ödəniş tələb edir.

Qəsəbə Bələdiyyələri Milli Assosiasiyasının sədri Hümbət Hüseynov isə deyir ki, qanunda əmlak vergisi müqabilində bələdiyyələrin qarşısına hansısa xidmət öhdəliyi qoyulmayıb.

Hümbət Hüseynovun sözlərinə görə, bu cür bildirişlər gələn sakinlər qeyd olunan məbləği vaxtında ödəsələr yaxşıdır. Çünki vaxt keçdikcə məbləğ daha da artır və böyük yükə çevrilir. Çünki gecikdirilən vəsaitləri icra məmurları vasitəsilə almaq üçün bələdiyyələrə tam səlahiyyət verilib. Üstəlik belə olanda vətəndaş icra məmurlarına da əlavə pul ödəməlidir.

Bəzən isə əmlak vergisi həm mənzil-istismar sahələri, həm də bələdiyyələr tərəfindən tələb edilir. Hümbət Hüseynov deyir ki, mənzil-istismar sahələri yalnız binanın saxlanması üçün xidmət haqqı tələb edir, bu isə əmlak vergisi ilə qarışdırılmamalıdır.

Yəni vətəndaşlar Mənzil-İstismar sahələrinə əmlak vergisi ödəmək məcbur deyil. Çünki, bu vergini toplamaq bələdiyyələrin səlahiyyətindədir.

Mövzu ilə bağlı daha ətraflı videomaterialı təqdim edirik: