Kart sistemi tətbiq edilən marşrut xətlərində gediş haqqının nağd şəkildə ödənilməsi qəti qadağandır.

Bu sözləri Bakı Nəqliyyat agentliyinin mətbuat xidmətinin rəhbəri Mayis Ağayev kart sistemi ilə işləyən avtobuslarda sürücülərin ödənişi nağd şəkildə qəbul etməsi ilə bağlı Axar.az-a açıqlama verərkən deyib.

O bildirib ki, belə halların baş verməsinə həm Bakı Nəqliyyat Agentliyi, həm də daşıyıcılar cavabdehdir:

“Bu cür faktların aşkarlanması qanun pozuntusu olmaqla yanaşı, həm də onu göstərir k, sürücü işlədiyi qurumu aldadır. Belə bir hal Nəqliyyat Agentliyi tərəfindən aşkarlanırsa, əvvəlcə daşıyıcıya məlumat verilir, bundan sonra sürücü haqqında lazımi cəza tədbirləri görülür. Əgər bu hal daşıyıcınının göstərişi ilə həyata keçirilirsə, bu zaman daşıyışı ilə bağlı tədbirlər görülür. Kart sistemi ilə işləyən bütün avtobuslarda nəzarət kamerası var. Buna isə daşıyıcılar nəzarət edir. Dəfələrlə bu cür hallar müşahidə olunub və həmin sürücülərə lazımi cəzalar verilib”.

Qeyd edək ki, hazırda kart sistemi 1, 2, 3, 5, 6, 8, 13, 14, 18, 21, 61, 65, 79, 85, 88, 96 və 125 saylı marşrut xətlərinə tətbiq olunur.