Sabah Təbrizin Eynalı yüksəkliklərindən əhalinin bütün təbəqələrinin iştirakı ilə sağlamlıq həftəsi çərçivəsində dağa qalxmaq aksiyası keçiriləcək. Aksiya səhər saatlarında başlayacaq.

Axar.az “Nəsr” portalına istinadən xəbər verir ki, aksiya Təbriz Səhiyyə Mərkəzi tərəfindən təşkil edilib. Aksiyada iştirak edənlər arasında püşkatma yolu ilə 10 ədəd dağ velosipedi paylanılacaq.

Püşkatma mərasimi səhər saat 9:00-da Eynalı dağının başında “Eynalı Restoranı”nın parkinqində baş tutacaq.

Qeyd edək ki, Eynalı dağı Təbriz şəhərinin şimal tərəfini əhatə edir. İstirahət və tətil günlərində minlərlə Təbriz sakini dağın yüksəkliklərinə çıxaraq, həm idman edir, həm şəhərin gözəl mənzərəsini izləyir. Eynalının arxa tərəfində çay, bulaqlar və söyüd ağacları ora gedənlərin istirahəti və gözəl anlar keçirməsi üçün şərayit yaradır.