Uzun müddətdir Təbrizin mərkəzi zindanında saxlanılan azərbaycanlı fəal Həbib Sasanian artıq 50-ci gündür aclıq aksiyası keçirir.

Bu barədə Axar.az-a fəalın yaxınları məlumat veriblər. Onlar Sasanianın səhhətinin getdikcə ağırlaşmasından ciddi narahat olduqlarını bildiriblər:

“Həbibin sağlamlıq durumu heç yaxşı deyil, onun qan təzyiqi 55-ə, qanındakı şəkərin miqdarı isə azalaraq sıfıra enib. O, aclıq aksiyasına başladıqdan indiyə qədər 22 kiloqram arıqlayıb. Həbib tez-tez ümumi zəiflikdən və halsızlıqdan huşunu itirir. O, davamlı olaraq sistem qoşulduqdan sonra özünə gəlir. Həmçinin Sasanianın bədəninin sağ tərəfi də öz hissiyyatını itirib.

Həbibə qarşı 5 ittiham irəli sürülüb, onlardan 4-ü artıq rədd edilib, lakin hazırda bir ittiham qalıb. Həmin ittiham yalnız Həbib məhkəməyə gələndən sonra onun özünə elan olunacaq”.

Qeyd edək ki, Həbib Sasanian iyunun 12-dən aclıq aksiyasına başlayıb. O, İran Kəşfiyyat Nazirliyinin (ETTELAAT) ona qarşı irəli sürdüyü ittihamların əsassız olduğunu və ədalətli məhkəmə keçirilərək azadlığa buraxılmasını tələb edir.

H.Sasanian 2016-cı il mayın 15-də 5 fəalla birlikdə Ərdəbildə saxlanılıb. Fəalın nədə ittiham olunduğu dəqiq məlum deyil. Bəzi mənbələr onun Azərbaycan-Ermənistan münaqişəsi və bu məsələ ilə bağlı maarifləndirmə işləri ilə məşğul olduğuna görə tutulduğunu iddia edirlər.