14-16 iyun tarixlərində "Qanun" nəşriyyatı və "Əli və Nino" nəşrlər evinin birgə təşkilatçılığı ilə Bakının Nərimanov rayonunda kitab sərgisi təşkil edilib.

Axar.az xəbər verir ki, oxucular 3 gün davam edən sərgiyə böyük maraq göstəriblər. Kitab yarmarkasında dünya ədəbiyyatından tutmuş yerli ədiblərə qədər, bir çox nadir əsərlərin nümunələrinə rast gəlmək olardı.

Sərgi zamanı kitablar oxuculara endirimli qiymətlərlə təklif olunub. Adi halda satışda 9 manata satılan kitablar 5 manata , 5 manatlıq kitablar isə cəmi 1 manata oxuculara təklif edilib. Hətta 2 kitab alana 3-cüsü hədiyyə olunub.

Sərgiyə elmi, bədii, dini, siyasi və fəlsəfi kitablarla yanaşı, dərslik və uşaq ədəbiyyatına aid kitablar da çıxarılıb.

Sərginin təşkilatçılarından olan "Qanun" nəşriyyatının direktoru Şahbaz Xuduoğlu Axar.az-a açıqlamasında yarmarkanın keçirilməsində əsas məqsədin oxucuların, xüsusən də gənclərin qiraətə olan marağını artırmaq olduğunu bildirib.

Satıcılar gün ərzində ən çox satılan kitabın Xalid Hüseyninin "Çərpələng uçuranda" əsəri olduğunu vurğulayıblar.