Ombudsman E. Süleymanova bu günlərdə yaradılmasının 20
illiyi qeyd olunan "Azərbaycan-Qazaxıstan" Dostluq Cəmiyyətinin
Fəxri Fərmanı ilə təltif edilib.
"Axar.az" Ombudsman Aparatının mətbuat
xidmətinə istinadən xəbər verir ki, həmin qurumun İdarə Heyətinin
üzvü olan Müvəkkil bu mükafata Azərbaycan və qazax xalqları
arasında sülh və dostluğun möhkəmləndirilməsində böyük töhfələrinə,
milli-mənəvi dəyərlərin təbliğində fəal iştirakına, insan
hüquqlarının müdafiəsi və təmin olunması sahəsində xidmətlərinə
görə və "Azərbaycan-Qazaxıstan" Dostluq Cəmiyyətinin yaradılmasının
iyirmi illiyi münasibətilə layiq görülüb.
"Azərbaycan-Qazaxıstan" Dostluq Cəmiyyətinin prezidenti,
professor Eldar Günaydın bu mükafatı İnsan Hüquqları üzrə Müvəkkilə
təqdim edib.
Qeyd olunmalıdır ki, ölkəmizdə hələ iyirmi il əvvəl yaradılmış
və səmərəli fəaliyyət göstərən "Azərbaycan-Qazaxıstan" Dostluq
Cəmiyyəti hər iki müstəqil respublikanın ictimai-siyasi həyatında
mühüm əhəmiyyət kəsb edir.
Bu qurum müstəqillik illərində iqtisadiyyat, elm və mədəniyyət,
həmçinin insan hüquqları sahəsində böyük nailiyyətlərə imza atmış
iki qardaş dövlət arasında qarşılıqlı əlaqələrin, dostluq və
tərəfdaşlığın daha da möhkəmləndirilməsinə kömək edir, öz
töhfələrini verir.