Vəkil Təranə Əliyeva Lotu Quli kimi tanınan Nadir Səlifovun azadlığa çıxması ilə bağlı məlumatlara münasibət bildirib.

Report-un xəbərinə görə, o bildirib ki, N.Səlifov Qaradağ Rayon Məhkəməsinin qərarı ilə ötən gün azadlığa çıxıb.

Vəkil qeyd edib ki, Lotu Quli hazırda Gürcüstandadır: "Onun səhhətində problemlər var".

O deyib ki, Lotu Qulinin vaxtından əvvəl azadlığa çıxması üçün məhkəməyə vəsatət veriblər: "Məhkəmə vəsatətimizi təmin edib və Nadir Səlifov cəzasının dörddə üçünü çəkdiyi üçün azadlığa buraxılması barədə qərar çıxarıb".

Xatırladaq ki, Nadir Səlifov 1972-ci il avqust ayının 28-də Gürcüstanın Dmanisi rayonunda doğulub. Onun ötən gün Bakıdakı 8 saylı cəzaçəkmə müəssisəsindən azadlığa buraxıldığı yayılmışdı.