Ana səhifə Toplum |
Millət vəkili Qənirə Paşayeva Bakı Dövlət Universitetinin Jurnalistika fakültəsinin tələbələri ilə görüşüb.
Axar.az xəbər verir ki, fakültənin dəvəti ilə gənc jurnalistlərlə görüşən millət vəkili onları jurnalistikaya gətirən səbəblərlə maraqlanıb. Q.Paşayeva özünün jurnalist fəaliyyəti ilə bağlı bir sıra təcrübələrini bölüşüb:
“Jurnalist olmaq istəyən şəxsdə maraq hissi o qədər güclü olmalıdır ki, müharibə bölgələrində çalışanda ölüm hissini, hər addımda yanınızda olan ölüm təhlükəsini belə unutdura bilsin. Jurnalistika bir sevdadır, yanğıdır, fədakarlıqdır.
Hansı sahədə olursa-olsun, öz işini ən yaxşı görən şəxs vətənpərvərdir. Vətənpərvərlik sözdə deyil, əməldə olur”.
Millət vəkili bildirib ki, cəmiyyətin hər zaman yaxşı jurnalistlərə ehtiyacı var:
“Harada doğulmasından və yaşamasından asılı olmayaraq, hər bir azərbaycanlı Azərbaycanın yanında olmalı, həqiqətlərin dünyaya daha geniş çatdırılması üçün çalışmalıdır”.
Q.Paşayeva gəncləri Qarabağ həqiqətlərinin dünyaya daha geniş yayılmasında sosial şəbəkələrin təqdim etdiyi imkanlardan geniş istifadə etməyə çağırıb. O, həmçinin gəncləri Azərbaycanın tarixini, ədəbiyyat və coğrafiyasını yaxşı öyrənməyə çağırıb.
Görüşün sonunda millət vəkili müəllifi olduğu kitabları tələbələrə imzalı hədiyyə edib.
Tarix
2017.11.13 / 18:09
|
Müəllif
Aygün Yusibova
|