"Lənkəranın Haftoni qəsəbəsində yerləşən "İstisu" sanatoriyasının əsaslı təmiri nəzərdə tutulub".

Bu sözləri Axar.az-a Lənkəran Şəhər İcra Hakimiyyətindən 5 ildən bəri fəaliyyəti dayandırılan Lənkəranın Haftoni qəsəbəsindəki "İstisu" müalicə və istirahət mərkəzinin fəaliyyət göstərməməsi ilə bağlı məsələyə aydınlıq gətirərkən bildirilib.

İcra Hakimiyyətindən sorğumuza verilən cavabda qeyd edilib ki, "Regionların 2014-2018-ci illərdə sosial-iqtisadi inkişafı üzrə" Dövlət Proqramı çərçivəsində pansionatın bu ildən etibarən təmirinə başlanacaq. Artıq icra müddəti də konkret müəyyənləşdirilib.

Haftoni qəsəbə sakinlərinin Axar.az-a yazdığı məktubda deyilir ki, Prezident İlham Əliyevin 2005-ci ildə imzaladığı sərəncamda rayonda turizmin inkişaf etdirilməsi məqsədilə Haftoni qəsəbəsindəki 150 nəfərlik "İstisu" sanatoriyasının əsaslı təmir olunması nəzərdə tutulurdu. Sakinlər yazırlar ki, Prezident sərəncamına əsasən, mərkəzin təmiri Maliyyə, Gənclər və İdman və Mədəniyyət və Turizm nazirliklərinə həvalə edilmişdi.

Qeyd edək ki, Dövlət Proqramının qəbul olunması səbəbindən Haftoni qəsəbəsindəki "İstisu" sanatoriyasının təmiri "Regionların 2014-2018-ci illərdə sosial-iqtisadi inkişafı üzrə" Dövlət Proqramına daxil edilib, icrası isə Maliyyə və Gənclər və İdman nazirlikləri ilə birgə, Lənkəran İcra Hakimiyyətinə həvalə edilib.