Dostunuzda və ya yaxınınızda kimdəsə maraq və iradənin olmaması, yuxu və iştah pozğunluğu, diqqət çətinliyi, unutqanlıq, qıcıqlanma, tez-tez ağlama, zəiflik, yorğunluq, ləyaqətsizlik kimi halla hiss edirsinizsə, bu, intihar əlamətləridir.

Axar.az xəbər verir ki, bu sözləri Modern.az-a müsahibəsində türkiyəli psixiatr Sibel Mərcan intihar səbəbləri barədə danışarkən deyib.

Psixiatr birinin intihar düşüncəsində olduğunu öyrənmək üçün bəzi ipucları da verib. O, bildirib ki, ailə və cəmiyyətdən ayrılma, depressiya intiharın ilkin əlamətləridir:

“İntihar yardım üçün fəryaddır əslində. İnsan ümidsizlik içində olur, başqa variantı olmadığını düşünür və emosionallıq digər variantları görməyə imkan vermir.

Maraq və iradənin olmaması, yuxu və iştah pozğunluğu, diqqət çətinliyi, unutqanlıq, qıcıqlanma, tez-tez ağlama, zəiflik, yorğunluq, ləyaqətsizlik, ümidsizlik, çarəsizlik, eyni zamanda səbəbsiz halallaşma və ya ailə üzvləri ilə vidalaşmaq. Bunlar hamısı intihar əlamətləridir.

İntihara cəhd edən insanlar ailədə heç kimin onlara qayğı göstərmədiyini düşünür. İntihar edən şəxs özündən sonra ailəsini də pis duruma salır. Ailə üzvləri cəmiyyətdən uzaqlaşmağa çalışırlar. Başqalarına zərər vermə düşüncəsi intihardan sonra buraxılan ən qorxulu izdir”.