Sakaryada Ərənlər Bələdiyyəsi tərəfindən İLESAM-ın dəstəyi ilə “Tək millət, tək göz yaşı - Xocalı” adlı gecə keçirilib.

Axar.az xəbər verir ki, proqram çərçivəsində Ərənlər Bələdiyyəsi Mədəniyyət Mərkəzində şeir gecəsi də təşkil edilib. Tədbirdə Ərənlər bələdiyyə başqanı Cavid Öztürk 26 fevral 1992-ci il tarixinin dünya üçün qara ləkə olduğunu deyib:

“Fevralın 25-dən 26-na keçən gecə işğalçı erməni silahlı qüvvələri tərəfindən Azərbaycanın Xocalı şəhərinə giriş və çıxış yolları bağlanıb, nəticədə 613 soydaşımız qətlə yetirilib, 150 soydaşımız isə itkin düşüb. Ancaq dünya buna gözlərini, qulaqlarını bağladı. Soydaşlarımıza qarşı edilən bu soyqırımın acısı bizim ürəyimizdədir. Bu soyqırım heç bir zaman unudulmayacaq”.

İLESAM Sakarya təmsilçisi Yasmin Qorqud şəhidlərimizin xatirəsini yad edərək, Nedim Saatçıoğlunun qələmə aldığı “Türk doğuldum, türk ölərəm” adlı şeiri oxuyub.

Millət vəkili Qənirə Paşayeva isə tədbirdə duyğusal nitq söyləyib:

“Mən qışı heç sevmirəm, 26 ildir isti otağımda, evimdə belə üşüyürəm. Çünki 26 il öncə o gözəl Vətən torpağında işğalçı Ermənistan tərəfindən insanlıq əleyhinə cinayətlər törədildi. Qadın, uşaq, yaşlı fərq qoymadan insanlarımız qətlə yetirildi. Soyqırıma məruz qalaraq evlərindən qaçmaq istəyən vətəndaşlarımız özləri ilə bir şey götürməyə belə imkanları olmadı. Kimisi üstləri, ayaqları çılpaq Xocalının o soyuq, qarlı, buz kimi fevral gecəsində bir erməni gülləsiylə donaraq can verdi. Məhz o səbəbdən mən həmişə üşüyürəm”.

Deputat çıxışının ardından müəllifi olduğu “Şəhidim” şeirini oxuyub.