Ramana südçülük sovxozu ərazisində torpaq sahəsi alan vətəndaşın torpağını başqasına satıblar.

Axar.az-a müraciət edən Bakı sakini Səfərov Elməddin Mirzə oğlu fırıldaqla üzləşdiyini bildirib. E.Səfərov 2013-cü ilin martında Əliyev Qalib Mirzə oğlundan Ramana südçülük sovxozu ərazisində torpaq sahəsi alıb.

Şikayətçi deyir ki, Q.Əliyev həmin torpaq sahəsini alğı-satqı yolu ilə deyil, Bakı şəhər 9 saylı notariat kontorunda təsdiq edilən etibarnamə ilə verib. Həmin etibarnaməyə əsasən, E.Səfərov mülkiyyət üzərində sahiblik hüququ qazanmasa da, onu satmaq, istifadə etmək, icarəyə vermək və başqa hüquqlar əldə edib. Şikayətçi qeyd edir ki, ona etibarnamə ilə verilmiş həmin ərazini hasara alaraq içərisində tikinti işləri də aparıb.

Lakin səhhətindəki problemlərlə əlaqədar olaraq tikinti işlərini davam etdirə bilməyib. E.Səfərov sonradan əraziyə baş çəkərkən torpağın başqa bir adama satıldığının şahidi olub. Bir aya yaxındır aidiyyəti qurumlara üz tutan şikayətçinin işində bir nəticə yoxdur:

"Hər yerdə mənim aldadıldığımı və zərər çəkdiyimi bilirlər. Amma bir neçə nəfərə satılan ərazinin sahibi kimdirsə, deyəsən böyük adamdır ki, ona heç nə edə bilmirlər. Artıq məsələ ilə bağlı Prezidentə də müraciət etmişəm".