İsmayıllının məşhur İvanovka kəndi susuz qalıb.

Axar.az yerli sakinlərə istinadən xəbər verir ki, kəndə köhnə boru xətti ilə normal su gəlirdi.

İndi nə köhnə, nə də ötən il çəkilən yeni su xəttindən kəndin su təchizatını təmin etmək mümkündür.

Yeni su xəttinin çəkilməsi üçün ölkə başçısının sərəncamı ilə dövlət büdcəsindən birinci dəfə 4 milyon, ikinci dəfə 3,8 milyon manat vəsait ayrılıb. Kəndin su maşınları, yanğınsöndürən maşınları kolxozçulara su verirlər. Mal-heyvanı suvarmaq, digər işlərini görmək üçün su qıtlığı çətinliklər yaradır.

"Nikitin" kolxozunun sədri Nikolay Dubrovin Axar.az-a məlumatı təsdiqləyərək əlavə etdi ki, bu problem həmişə olub: "Son illər daha çox əziyyət çəkirik. Maşınlarla su gətirməkdən təngə gəlmişik. Ancaq kəndi su ilə təmin etmək üçün əlimizdən gələni edirik".

Kolxoz sədri söylədi ki, bu il quraqlıq olduğu üçün vəziyyət daha pis olub:

"Gün ərzində kəndə 4 maşınla su gətiririk ki, suvarmada istifadə edək, camaata da verək. Bulaqlardan pulsuz istifadə etsək də, çox vaxt suyu pulla alırıq".