"Azadlıq" qəzeti ilə aramızda heç bir problem yoxdur və gələcəkdə də olmayacaq.

Bu sözləri KİV DF-nin icraçı direktoru Vüqar Səfərli Fondun "Azadlıq" qəzetinin layihə maliyyələşdirilməsini dayandırması haqda danışarkən dedi.

Vüqar Səfərli qəzetlə əməkdaşlığa xitam verməmişdən əvvəl, xeyli müddət "Azadıq"a güzəşt etdiklərini bildirdi:

"Biz o pulu "Azadlıq" qəzetinin hesabına keçirsək, cərimələrə silinəcək. Ona görə də layihələri dayandırmışıq. Burda hər hansı qərəzdən söhbət gedə bilməz. Borcları silinəndən, hesablarındakı həbs qalxandan sonra "Azadlıq" qəzeti ilə aramızda əməkdaşlıq bərpa olunacaq. Onu da deyim ki, biz o layihəni onların hesabına həbs qoyulan kimi də saxlaya bilərdik, amma məsələnin bir müddətdən sonra həll olunacağını düşündük. İndi görürəm ki, problem öz həllini tapmır. Özü də "Azadlıq" qəzeti layihə çərçivəsində qeyd olunan materialları verir, biz isə onlara pul ödəyə bilmirik. Ona görə də qərara gəldik ki, layihəni dayandıraq. Yenə deyirəm, burda heç bir siyasi motiv yoxdur".

Xatırladaq ki, "Azadlıq" qəzetinin baş redaktorunun birinci müavini Rahim Hacıyev "Azadliq.info"ya verdiyi açıqlamada KİV DF-nin qəzetlə olan əməkdaşlığa siyasi sifariş əsasında son qoyduğunu bildirib.