Balakən rayonunun Qaysa kəndinin imamı 18 yaşdan aşağı olan qızlara dini nikah kəsmir.

Axar.az xəbər verir ki, “BBC Azərbaycan”a danışan sözügedən kəndin bir qrup qadın sakini nikah yaşına çatmayan qızlara dini kəbib kəsilməməsi üçün imama müraciət ediblər. Erkən nikahla mübarizə aparan kəndin qadınları bu işdə onlara yardım etməsi üçün kəndin imamından da kömək istəyiblər.

Balakən rayonu Qaysa kəndinin imamı Məhəmməd Xutrayev məlumatı təsdiqləyib və deyib ki, həm şəriət, həm də dövlət evlilik üçün həddi-büluğ yaşını 18 kimi tanıyır. Bu səbəbdən də o, 18 yaşdan aşağı olan qız uşaqlarına nikah kəsmir:

“Əgər yaşı gizlətmə halı olarsa, biz onlardan doğum haqqında şəhadətnamə və ya şəxsiyyət vəsiqəsi tələb edirik. Kəndin qadınları erkən nikahlar haqda bizə məlumat verirlər və vaxtaşırı bizimlə məsləhət edirlər".

Qeyd edək ki, rəsmi qadağa olmasına baxmayaraq, bir çox halda mollalar hüddi-büluğa çatmayan qızlar üçün dini nikah kəsirlər.