Elxan Orucov bu il Soçidə 16-17 yaşlı yeniyetmələr arasında keçirilən yarışlarda 75 kq çəki dərəcəsində pauerliftinq idman növü üzrə qızıl medal qazanıb.

Bu barədə Axar.az-a açıqlama verən E.Orucov bildirib ki, bu qalibiyyəti ilə o yaşıdları arasında Açıq Avropa Çempionu adını qazanıb. O, qalibiyyətində müəlliminin çox böyük rolu olduğunu deyib:

“3 il bundan əvvəl müəllimim pauerliftinq üzrə dünya çempionu Gündüz İsmayılov məni bu idman növünə həvəsləndirib. Düzü, müəllimim məni tapıb. Bu idmanla məşğul olmaq nəinki təhsilimə mane olur, hətta müəyyən qədər kömək edir. İdmançı olduğuma görə məktəbdə müəllimlər də müəyyən qədər güzəşt edirlər. Bundan sonra əsas məqsədim daha böyük qalibiyyətlər əldə etməkdir. Çalışacağam ki, müəllimimin də başını uca edim”.

Qeyd edək ki, E.Orucov 2017-ci ilin iyun ayında Gürcüstanın paytaxtı Tiflisdə keçirilən yarışlarda qalib gələrək, dünya çempionu adını qazanmışdı.