Bir neçə dövlət qurumu hərraca maşın təqdim edib.

Axar.az xəbər verir ki, bu məqsədlə Əmlak Məsələləri Dövlət Komitəsi 14 avqust tarixində avtomobil həvəskarları üçün auksion təşkil edəcək. Hərraca ümumilikdə 16 müxtəlif markalı avtomobil çıxarılıb.

Milli Məclis 2, Daxili İşlər Nazirliyinə tabe olan idarələr ümumilikdə 5, Nəqliyyat, Rabitə və Yüksək Texnologiyalar Nazirliyinin ləğv edilmiş müəssisəsi 4, Dövlət Sığorta Kommersiya Şirkətinin iki ayrı filialı 2, Bakı Şəhər İcra Hakimiyyəti 2, Kəlbəcər Rayon İcra Hakimiyyəti isə 1 avtomobilini satır.

Hərraca təqdim edilən ən bahalı avtomobil Daxili İşlər Nazirliyi Maddi-Texniki Təminat Baş İdarəsinə bilavasitə tabe olan Avtomobil Təsərrüfatına aid “BMV 320i” markalı avtomobilidir ki, ilkin start qiyməti 5200 manatdan başlayır.

Ən ucuz avtomobil isə Milli Məclisin təqdim etdiyi “Qaz-31029” markalı avtomobildir. Onun üçün ilkin start qiyməti 800 manat müəyyən edilib.