Azərbaycan Milli Qəhrəmanı Allahverdi Bağırovun abidəsi ermənilər tərəfindən dağıdılıb.

Axar.az xəbər verir ki, bunu ermənişünas İsmayıl Tanrıverdi Feysbuk səhifəsində yazıb.

O bildirib ki, Ağdamda, Milli Qəhrəman Allahverdi Bağırovun şəhid düşdüyü yerdə keçmiş erməni dostları tərəfindən hələ 1994-cü ildən ona abidə qoyulub:

"Erməni hərbi operator Arşak Zakaryan 2 gün öncə bunu araşdırdıqda şoka düşüb və bütün Ermənistana car çəkib ki, ay aman, qoymayın, ermənilər "erməni torpağında" onların düşməninə abidə - qəbir daşı qoyublar".

Bundan sonra Xankəndidən gələn bir qrup erməni qəbir daşını şəhərin mərkəzinə aparıb. İ.Tanrıverdi qeyd edib ki, ermənilər daşdan heyf alıblar. Daşı param-parça etdikdən sonra Razmikin axtarışına çıxıblar:

“Razmik də açıq-aşkar xalqa müraciət edərək bildirib ki, düzdür, o abidəni mən dostlarımla birlikdə düzəltmişəm. Biz Allahverdi ilə gənclik dostu olmuşuq. Hətta birlikdə futbol komandasında oynamışıq. Lakin müharibə başlayarkən biz məcburən bir-birimizə qarşı barrikadalarda dayanmalı olduq. Sonra yenə də görüşüb əsirlərin dəyişdirilməsində və s. iştirak edirdik”.

Qeyd edək ki, qəbir daşının Razmik Petrosyan və dostları tərəfindən düzəldildiyi abidədə də qeyd olunmuşdu.