Amerika Yəhudiləri Yardım Təşkilatının (Vaad L Hatzolas Nidchei Yisroel) Azərbaycan bölməsinin rəhbəri Rav Shmuel Simantov və təşkilatın mətbuat xidmətinin katibi Murad Salmanov Azərbaycan Respublikası Prezidenti Yanında Bilik Fondunu ziyarət ediblər.

Təşkilatdan Axar.az-a verilən məlumata görə, görüş zamanı Rav Shmuel Simantov ilə Fondun rəhbəri Oqtay Səmədov arasında ikitərəfli əmədaşlıq haqqında müzakirə aparılıb. Fond barədə məlumat verən Oqtay Səmədov yəhudilərlə Azərbaycan xalqının qardaşlığından bəhs edib.

Rav Shmuel Simantov Azərbaycanda gördükləri xoş münasibətdən və tolerantlıqdan danışaraq bildirib ki, tolerantlıq azərbaycan xalqının qanında, canındadır. Bu gün Azərbaycan dünyada öz tolerantlığı ilə seçilir. Bu gözəl nailiyyətlər ümumili lider Heydər Əliyev və onun layiqli davamçısı cənab Prezident İlham Əliyevin uğurlu siyasəti nəticəsində qazanılıb.

Görüş zamanı fondun əməkdaşları ilə Rav Shmuel Simantov arasında maraqlı diskussiya aparılıb. Sonda fondun rəhbəri Oqtay Səmədov Rav Shmuel Simantova hədiyyə təqdim edib.