Bu gün Gənc Diplomatlar Birliyinin "Azərbaycan-Qazaxıstan xalqlararası münasibətlərin inkişafında gənclərin rolunun təmin edilməsi" beynəlxalq layihəsinin təşkilat komitəsi layihə çərçivəsində Xarici İşlər Nazirliyində görüş keçirib.

Bu haqda məlumat Axar.az-a Gənc Diplomatlar Birliyindən daxil olub. Gənc diplomatları Nazirliyin mətbuat xidmətinin rəhbəri Elman Abdullayev qəbul edib. Görüş zamanı Astanaya səfər öncəsi bir sıra müzakirələr aparılıb:

"XİN-də olan görüşümüz digərlərindən tamam fəqlənərək çox səmimi şəkildə keçdi. Elman Abdullayev bizimlə Qahirə və Nyu Yorkda oxuduğu tələbəlik illərindən tutmuş bu günə qədərki diplomatik fəaliyyətindəki təcrübəsinə qədər, bir çox məqamları bölüşdü. Həmin dövrlərdə, xüsusilə Los Ancelesdə konsul işlədiyi zaman ermənilərlə üzləşdiyi problemləri xüsusi qeyd edən diplomat bu yolda qətiyyətli olmağı, ümummilli lider Heydər Əliyev və azərbaycançılıq ideologiyasına hər zaman sadiq bir vətəndaş olmağı tövsiyyə etdi".

Xatırladaq ki, bu yaxınlarda Beynəlxalq Mətbuat Mərkəzində Azərbaycan Gənc Diplomatlar Birliyinin "Azərbaycan və Qazaxstan ölkələri arası münasibətlərdə gənclərin rolunun artırılması" istiqamətində görüş keçirilmişdi.