Azərbaycanın 17 gənc alimi ixtisasartırma təhsili almaq üçün Avropanın elmi mərkəzlərinə ezam olunacaqlar.

Bu barədə Axar.az-a Azərbaycan Milli Elmlər Akademiyasından məlumat veriblər.

AMEA prezidenti, akademik Akif Əlizadənin imzaladığı sərəncama əsasən, akademiyanın 17 gənc alim və mütəxəssisi doktorantura və elmi-tədqiqat işinə dair ixtisasartırma təhsili almaq üçün Avropanın elmi mərkəzlərinə ezam olunacaq.

Ezam olunacaq gənclər AMEA rəyasət heyəti tərəfindən keçirilən müsabiqə yolu ilə seçiliblər. Ezamiyyətin müddəti və maliyələşdirmə imkanları AMEA və Təhsil Nazirliyi arasında imzalanmış müqaviləyə görə müəyyənləşdiriləcək. Gənclər Avropanın bir çox ölkələri, o cümlədən Rusiya və Türkiyənin tanınmış universitet, elmi-tədqiqat mərkəzi, müəssisə və təşkilatlarında təhsil alacaq.

Qeyd edək ki, bu qərar "2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı" çərçivəsində həyata keçirilir.