Smart-kartlı su sayğaclarının sınaqdan keçirmək məqsədilə laborotoriya yaradılıb.

Bu barədə Axar.az-a "Azərsu" ASC-dən məlumat veriblər.

Belə ki, "Azərsu" sayğaclaşma işlərinin tətbiqi dairəsinin genişləndirilməsi ilə yanaşı, onlara mütəmadi texniki xidmət göstərilməsini də planlaşdırır. Bu məqsədlə ASC tərəfindən su sayğaclarının sınağı laboratoriyasının yaradılmasına qərar verilib.

Hazırda laboratoriyada tamamlama işləri həyata keçirilir. Laboratoriya binası su sayğaclarının sınağı, təmiri sahələrindən, anbar, inzibati və yardımçı hissələrdən ibarətdir. Laboratoriyada Türkiyə və Avropa ölkələrinin istehsalı olan müasir cihaz və avadanlıqlar quraşdırılıb.

Qeyd edək ki, Su sayğaclarının sınağı laboratoriyasında məişətdə və sənayedə istifadə olunan su sayğacları dövlət müqayisəli yoxlamadan keçiriləcək. Ümumilikdə ay ərzində laboratoriyada 2700 ədəd su sayğacını yoxlamadan keçirmək üçün imkanlar mövcuddur.

Xatırladaq ki, Standartlaşdırma, Metrologiya və Patent üzrə Dövlət Komitəsinin təlimatına uyğun olaraq məişətdə istifadə olunan su sayğacları 5 ildə ən azı bir dəfə yoxlamadan keçirilməlidir.