Əlil və şəhid ailələri üçün yeni çoxmənzilli yaşayış
binasının inşasına başlanılıb.
Bu barədə Axar.az-a Əmək və Əhalinin Sosial Müdafiəsi
Nazirliyindən məlumat veriblər. ƏƏSMN-nin şifarişi ilə Bakı
şəhərinin Nizami rayonunda ölkəmizin müstəqilliyi, ərazi bütövlüyü
və Konstitusiya quruluşunun müdafiəsi zamanı əlil olmuş vətəndaşlar
və şəhid ailələri üçün 12 mərtəbəli 96 mənzilli yaşayış binasının
inşasına başlanılıb.
Hazırda bu təbəqələrdən olanlar üçün Tərtər, Beyləqan və İmişli
rayonlarının hər birində 6 mərtəbəli 54 mənzilli, Şamaxı rayonunda
4 mərtəbəli 36 mənzilli, gözdən əlil şəxslər üçün isə Bakı
şəhərinin Nərimanov rayonunda 12 mərtəbəli 132 mənzilli yaşayış
evləri inşa etdirilir.
Xatırladaq ki, bu ilin ötən dövründə ƏƏSMN-nin sifarişi ilə
ölkənin müxtəlif regionlarında inşa olunmuş binalarda ümumilikdə
172 mənzil əlil və şəhid ailələrinin istifadəsinə verilib.
Nazirlikdən qeyd ediblər ki, Prezidentin 20 iyun 2014-cü il
tarixli Sərəncamına əsasən 2014-cü ilin 1 yanvarınadək mənzil
növbəsinə götürülmüş əlil olmuş şəxslərin və şəhid ailələrinin
2014-2018-ci illərdə mərhələli şəkildə mənzillərlə, o cümlədən kənd
rayonlarında fərdi evlərlə təmin olunması həyata keçiriləcək.