Sentyabrın 30-da Əmircan qəsəbəsindəki 97 saylı məktəbin müəlliməsi 49 yaşlı Rima Bəşirova şagirdlərinin gözü önündə valideyn tərəfindən döyülüb.

Vesti.az xəbər verir ki, Suraxanı Rayon Polis İdarəsinin 31-ci polis bölməsindən Azərbaycan dili və ədəbiyyatı müəllimini Böyükxanım adlı valideynin təhqir etdiyini bildiriblər. Səhər saat 8-də valideyn Rima Bəşirovanın uşaqlara dərslik paylamamasına görə valideyn dava salıb: "O müəllimi təhqir edib və şillə vurub. Biz məktəbə gəldikdə Rima Bəşirovanın üzündə onun barmaq izləri hələ də qalmışdı", - polisdən bildiriblər.

Polisin sözlərinə görə, valideyn özünü günahkar hesab etmir və üzr istəməyə hazırlaşmır. O, polisə qarşılıqlı ərizə verərək, Bəşirovanı öz oğlunu – beşinci sinif şagirdini bir neçə dəfə təhqir etməkdə və uşağı hamının gözü qarşısında küncdə saxlamaqda ittiham edir.

Polislər qadına yuxarıda sadalananların müəllimi döymək üçün bəhanə olmadığını izah etməyə çalışsalar da, bu fayda verməyib. Qadın üzr istəmək fikrində belə deyil.

"Yaxın günlərdə işin materialları araşdırılmaq üçün məhkəməyə veriləcək", - polisdən deyiblər.