"Əvvəllər qız uşaqlarının üstünlük təşkil etdiyi
Azərbaycanda üzün sürən cinayət xarakterli proseslərdən sonra
oğlanların sayını artırmağa nail olunub".
Bu sözləri Axar.az-a psixoloq Dəyanət Rzayev Azərbaycanda ən
aktual məsələ olan qız uşaqlarının istənilməməsi ilə bağlı açıqlama
verərkən deyib.
Onun sözlərinə görə, bu qədər inkişafın getdiyi bir cəmiyyətdə
hələ psixopat, sosiopat insanların olması çox dəhşətli bir
haldır:
"Azərbaycanda keçmişin qaranlıqlarına qərq olmasına baxmayaq,
hələ də qızlarının evdə qalmasından qorxu hissi keçirən və bu
feodal adət üzündən qızlarını kiminlə gəldi evləndirən analar var.
Ən dəhşətlisi isə bilə-bilə ki, qarşısındakı insan narkoman və ya
psixopatdır, yenə də bu addım atılır. Nəticə etibarilə vəziyyət o
həddə gəlib çatıb ki, sanki "qız övladı bir canidir və o, tələf
olunmalıdır" kimi tarixin arxivinə atılmış gerçəklik bu gün yenidən
qayıdır. Çox acınacaqlı bir haldır ki, qız uşaqlarının tələf
olunmasını daha çox istəyən məhz xanımların həyat yoldaşlarıdır.
Maraqlıdır, bu gün qız övladını istəməyən və bu üzdən də cinayətə
əl atan bir şəxs hansı atalıqdan danışa bilər? Belə insanlar,
görünür, vaxtilə etdikləri pis əməllərdən dolayı qız atası olmaqdan
çəkinirlər. Çox təəssüflə bildirmək istəyirəm ki, bu kimi hallar
ölkəmizdə baş verir. Bu gün belə hallarla rastlaşan onlarla gənc
ana ağır psixoloji durumda bizə müraciət edir. Əgər gələcəyin bir
əsgərinin, bir həkiminin anası bunu yaşayırsa, o zaman hansı parlaq
gələcəkdən danışmaq olar? Ən dəhşətlisi isə bəzi valideynlər
məsuliyyətsizliyin elə bir pik nöqtəsində çatıblar ki, hətta öz
övladlarını bil-bilə oda atırlar. Bu gün cəmiyyətdə sözün əsl
mənasında həyəcan təbili çalınmalıdır".