"Azəryolservis" ASC-nin sədri Cavid Qurbanovun babası, Azərbaycanın məşhur aşıqlarından biri olan Dədə Şəmşirin Binəqədi rayonu, Biləcəri qəsəbəsindəki heykəli sökülüb.

Bu məlumatı yerli sakinlər "Axar.az"a bildiriblər. Cəmi bir neçə ay əvvəl ucaldılan və təmtəraqla açılışı keçirilən bir heykəlin sökülməsi xəbərini dəqiqləşdirmək üçün olay yerinə yollandıq.

Sakinlərlə söhbətdən məlum olub ki, bu heykəl təxminən 3 ay bundan qabaq sökülüb. Belə ki, Cavid Qurbanov küçənin girəcəyindəki zibilliyi abadlaşdırıb, çox da hündür olmayan barı ilə əhatələyib, gül kolları əkilib, yaşıllıq salınıb. Sakinlərin istirahət etməsi üçün skamyalar qoyulub. Postamentin üstündə aşığın tuncdan tökülmüş büstü və yanında da Şəmşir bulağı qurulub, həmçinin Aşıq Şəmşirin şeirlərindən parçalar yazılıbmış.

Sakinlər heykəlin sökülməsinin səbəbini bilmədiklərini də dedilər.

Binəqədi rayon icra hakimiyyəti ilə əlaqə yaratma cəhdlərimiz isə növbəti dəfə alınmadı.