Sumqayıtdakı "Karvan" Ticarət Mərkəzində yanğınla bağlı şok detallar üzə çıxıb.

Axar.az-ın mötəbər qaynaqdan əldə etdiyi məlumatda iddia olunur ki, yanğın ticarət mərkəzinin rəhbəri Ağamirzə Əhədova borcu olan sahibkarlardan biri tərəfindən törədilib. Ötən ilki yanğından sonra ziyana düşən, müflis olan və vəziyyətdən çıxış üçün təzminat ala bilməyən sahibkar "Karvan"ın rəhbəri Ağamirzə Əhədovdan qisas almaq istəyib.

Mənbənin sözlərinə görə, A.Əhədov ötən il hadisədən sonra obyekt sahiblərinə dəyən ziyanı ödəməyib. Bunun qarşılığında ziyana düşən sahibkarlar etirazlar etsə də, faydası olmayıb.

Mənbə iddia edir ki, sahibkarlardan biri obyektini təmir edib, külli-miqdarda borc götürüb və ödəyə bilmədiyi halda bu yola əl atıb. Amma hər halda, bu bir iddiadır.

Qeyd edək ki, budəfəki yanğın ötən il oktyabrın 19-da baş vermiş yanğından güclü deyildi. Amma yenə də zərərçəkənlər var. Budəfəki yanğın ötən ilkindən fərqli olaraq can aldı.

Yanğının ilkin ehtimal olaraq qısaqapanmadan olduğu deyilsə də, hər şey araşdırmalardan sonra dəqiq təsdiqini tapacaq.

Xatırladaq ki, ötən il oktyabrın 19-da saat 19:30 radələrində "Karvan" ticarət mərkəzində başlayan dəhşətli yanğın nəticəsində 23.700 kvadratmetr sahə külə döndü. 1000-ə yaxın ticarət obyekti yararsız hala düşdü, ticarət mərkəzinin özünə 2 milyon manat, sahibkarlara isə yüz minlərlə manat dəyərində ziyan dəydi.

Virtualaz.org isə yazıb ki, 9 gün sonra - oktyabrın 19-da "Karvan" ticarət mərkəzinin sahibi Ağamirzə Əhədovun ad günüdür. Ötən il A.Əhədova ad günündə "sürpriz" ediblər. Ticarət mərkəzinin sahibi ötən ilki yanğın xəbərini restoranda özünə ad günü keçirərkən alıb. Bu il də A.Əhədova ad günü qabağı "hədiyyə" oldu.